Azərbaycan çempionu “Qarabağ” növbəti avrokubok oyununu keçirəcək.
APA-nın məlumatına görə, Ağdam klubu Avropa Liqasının pley-off mərhələsində cavab görüşünə çıxacaq.
Qurban Qurbanovun yetirmələri Şimali İrlandiyanın “Linfild” klubunu sınağa çəkəcək. Ötən həftə Belfastdan 2:3 hesablı məğlubiyyətlə qayıdan çempion mərhələ adlamaq üçün mütləq qalib gəlməlidir. Üstəlik, qalibiyyət zamanı 2 və ya daha çox qol buraxılarsa, fərq minimal olmamalıdır.
Ardıcıl çempionluqlar qazandığı son 5 mövsüm daim avrokubokların qrupunda yer alan “Qarabağ” dörd dəfə Avropa Liqası, bir dəfə Çempionlar Liqasının əsas mərhələsinə çıxıb. 6-cı uğurunu gerçəkləşdirmək üçün meydana çıxacaq təmsilçimizin cəzalı futbolçuları Riçard Almeyda və Rahil Məmmədovun sıraya dönüşü də komandanın gücünə güc qatacaq.
Bu qarşılaşma Q.Qurbanovun avrokuboklarda yubiley – 100-cü matçı olacaq. “Qarabağ”ın qələbəsi həm klubun tarixinə, həm də mütəxəssisin avrobok karyerasına 40-cı kimi düşəcək.
Qeyd edək ki, “Qarabağ”la Şimali İrlandiya çempionunun dueli Tofiq Bəhramov adına Respublika stadionunda baş tutacaq. Matç saat 20:00-da başlayacaq.
Avropa Liqası
Pley-off mərhələsi
Cavab oyunu
29 avqust
20:00. “Qarabağ” (Azərbaycan) – “Linfild” (Şimali İrlandiya)
Baş hakim: Sergey İvanov
Baş hakimin köməkçiləri: Roman Usaçov, Valeri Dançenko
Dördüncü hakim: Sergey Lapoçkin (hamısı Rusiya)
Hakim-inspektor: Alan Hamer (Lüksemburq)
UEFA nümayəndəsi: Marko Simeunoviç (Sloveniya)
Tofiq Bəhramov adına Respublika Stadionu
İlk oyun: 2:3
