UEFA Çempionlar Liqasının 63 illik tarixi ərzində bu turnirdə çıxış etmiş klubların reytinq siyahısını dərc edib.
Azxeber.com xəbər verir ki, 1955-ci ildən keçirilən (1992-ci ilə qədər Çempionlar Kuboku adlanıb) turnirdə 5 dəfə iştirak etmiş “Qarabağ” 100-cü pillədə qərarlaşıb. Azərbaycan təmsilçisinin aktivində 33 xal var.
Bir dəfə qrup mərhələsinə vəsiqə qazanmış “Qarabağ” turnirdə indiyədək 30 oyun keçirib. 11 oyunda qələbə qazanan təmsilçimiz eyni sayda heç-heçəyə razılaşıb və 8 dəfə uduzub.
Azərbaycanın digər təmsilçiləri – “Neftçi” 167-ci, “Bakı” 265-ci, “Keşlə” 290-cı, “Şəmkir” 389-cu, “Kəpəz” 390-cı, “Xəzər Lənkəran” 415-ci pillədə qərarlaşıb.
Çempionlar Liqası tarixinin ən yaxşı klubu Madrid “Real”ıdır. 16 dəfə final oynayan və 13 dəfə kuboku qazanan (rekord) “Kral Klubu”nun aktivində 590 xal var. “Bavariya” 462 xalla ikinci pillədə qərarlaşıb. Almanlar indiyədək oynadıqları 10 finaldan 5-ni qazanıblar. İlk “üçlüy”ü “Barselona” tamamlayır – 427 xal. Kataloniyalılar 8 dəfə finala çıxaraq 5 dəfə kuboku qazanıblar.
