"Bakı Metropoliteni" baş verən hadisələrin təfərrüatını açıqlayıb.
Qurumun mətbuat xidmətinin rəhbəri Nəsimi Paşazadə qeyd edib ki, özünü pis hiss edən sərnişinlərə dərhal tibbi müdaxilə edilib: "Əslində, hadisə yerində olan və ya zəng edən KİV nümayəndələrinə bütün açıqlama verilirdi. Amma yenə də nə baş verdiyini yazım. Nəzərə alın ki, bayaqdan hadisə yerində idim və buradan ünvanladığınız suallara cavab verə bilmirdim. Hazırda işdəyəm və sizə açıqlama verməklə məşğulam. 28 may və Gənclik stansiyaları arasında tüstülənmə müşahidə edilmişdi. Dərhal əməkdaşlarımız tunelə düşdülər ki, hadisənin baş vermə səbəbini aydınlaşdırsınlar. Təlimata uyğun olaraq da, dərhal FHN yanğından mühafizə xidmətinə və təcili tibbi yardıma müraciət olundu.
İki stansiyaarasındakı tunellərdə bir-birinə keçid tuneli var. Oradakı lövhədə kabellərdə qısa qapanma nəticəsində qızma baş vermişdi. Bunun nəticəsində naqillərin üstündəki təbəqə ərimişdi və tüstülənmə əmələ gəlmişdi. Qatarların hərəkəti nəticəsində və havalandırmaya görə tüstülənmə Gənclik və 28 may stansiyalarında da müşahidə edilirdi. Operativ tədbirlər nəticəsində hadisə aradan qaldırıldı. Sərnişinlər və qatarların hərəkəti üçün qısa müddətlik məhdudiyyət aradan qaldırıldı. İstər sərnişinlərin həyatına, istərsə də metropoliten əməkdaşlarının həyatına hər hansı problem yaranmayıb. Özünü pis hiss edən sərnişinlərə dərhal tibbi müdaxilə edilib və bütün sərnişinlər el diliyən desək öz ayaqları ilə metronu tərk ediblər".
