Ev heyvanları saxlayanlar siqaret çəkirlərsə, onların it və pişiklərində burun şişləri, limfomalar, tənəffüs yolları xəstəlikləri, astmanın kəskinləşməsi ehtimalı daha yüksək olur.
Bunu tanınmş həkim endokrinoloq Zuhra Pavlova "Max"da bildirib.
Mütəxəssisin sözlərinə görə, yeni tədqiqatlar maraqlı məqamları ortaya çıxarıb. Siqaret çəkməyin qarşısının alınması üçün qeyri-ənənəvi yanaşma təklif edilir. Belə ki, tədqiqat müəllifləri belə hesab edirlər ki, bir çox insan öz sağlamlıqları naminə pis vərdişlərindən imtina etmək istəmir. Lakin onlar saxladıqları ev heyvanları naminə davranışlarını dəyişdirməyə hazırdırlar.
Pavlova onu da qeyd edib ki, tədqiqatçılar baytarların da siqaret çəkmək kimi pis vərdişin qarşısının alınmasında daha fəal iştirakını təklif edirlər. Çünki ev heyvanları passiv şəkildə də olsa tüstüyə məruz qalırlar.
Həkimin sözlərinə görə, siqaret çəkən adamlarla bir evdə yaşayan it və pişiklərdə, xüsusən də itlərdə burun şişləri, pişiklərdə limfomalar, tənəffüs yolları xəstəlikləri və astmanın kəskinləşməsi diaqnozu qoyulma ehtimalı daha yüksək olur. O, ev heyvanlarının daim sahibləri ilə eyni havanı udduğunu və tüstüyə məruz qalmaqdan qaça bilmədiklərini vurğulayıb.
