28.12.2024-cü il tarixdə Şəki-Zaqatala Regional Mədəniyyət İdarəsinin dəstəyi, Şəki şəhər Heydər Əliyev Mərkəzi, 2 nömrəli Uşaq Musiqi məktəbi, 9 nömrəli kitabxana filialının birgə təşkilatçılığı ilə Azərbaycan şairi, nasir, dramaturq, publisist, tərcüməçi, ssenarist Nəbi Xəzrinin 100 illiyi münasibəti ilə "Sözün mənası" adlı yubiley tədbiri keçirilib.
Tədbirdə Şəki-Zaqatala RMİ-nin əməkdaşları, müəssisə rəhbərləri, mədəniyyət işçiləri və şəhər içtimaiyyəti iştirak edib.
Görkəmli xalq şairinin həyat və yaradıcılığını əks etdirən videoçarx nümayiş edilib, 2 nömrəli Uşaq Musiqi məktəbinin müəllimlərinin ifasında Nəbi Xəzri şeirlərinə bəstələnmiş musiqi nümunələri səsləndirilib.
Nəbi Xəzri poeziyası dünya, insan və təbiət haqqında fəlsəfi məzmunu, yüksək humanizmi, böyük vətəndaşlıq qayəsi və milli koloriti sayəsində geniş oxucu kütləsinin rəğbətini qazanmışdır.
Şair dilimizin poetik imkanlarından ustalıqla bəhrələnərək, poeziyanın gözəl nümunələrini yaratmaqla ədəbi dilimizin inkişafına töhfələr vermişdir. Poeziyasının dilinə xas olan şeriyyət, rəvanlıq və axıcılıq Nəbi Xəzri şeirlərinə bəstəkarların müraciət etmələri üçün zəmin yaratmışdır. Xalqımızın tanınmış sənət ustalarının repertuarında mühüm yer tutan bu əsərlər Azərbaycan musiqi mədəniyyətinin inciləri sırasına daxil olmuşdur.
Nəbi Xəzrinin ədəbi və ictimai fəaliyyəti yüksək qiymətləndirilmişdir. O, bir sıra orden və medallara, o cümlədən Azərbaycan Respublikasının ali dövlət təltiflərinə — "Şöhrət" və "İstiqlal" ordenlərinə layiq görülmüşdür.
İllər və sahillər" (1969), "Ulduz karvanı" (1979), "Nəsillər-əsrlər" (1985), "Ağ şimşəklər" (1986), "Torpaq sənə and içirəm" (1989), "Ömür çinarından yarpaqlar" (1995), "Əsrin qanlı laləsi" (1996) və s. kitabların müəllifidir.
#poeziya #mədəniyyət #şair
