Mərkəzi Aran Regional Mədəniyyət İdarəsinin təşkilatçılığı ilə Azərbaycan Respublikasının Əməkdar artisti, Azərbaycan Dövlət Mədəniyyət və İncəsənət Universitetinin professoru, bədii qiraət ustası Ağalar Bayramovun 70 illik yubileyi münasibətilə mayın 17-də Ucar rayon Heydər Əliyev Mərkəzində ədəbi-bədii gecə təşkil edilib.
Tədbirdə Mərkəzi Aran Regional Mədəniyyət İdarəsinin rəisi Aydın Bəşirov və idarənin əməkdaşları, Ucar Rayon İcra Hakimiyyətinin məsul şəxsi, Yeni Azərbaycan Partiyasının Ucar rayon təşkilatının sədri, rayon ictimaiyyətinin nümayəndələri, mədəniyyət müəssisələrinin əməkdaşları iştirak ediblər.
İlk olaraq iştirakçılar Ulu öndər Heydər Əliyevin Ucar rayonundakı abidəsini ziyarət edərək, abidə önünə gül dəstələri düzüb, Ümummilli liderin xatirəsinə ehtiramlarını bildiriblər.
Tədbirin bədii hissəsinə başlamazdan əvvəl qonaqlar tərəfindən torpaqlarımızın azadlığı uğrunda canlarını qurban vermiş şəhidlərin əziz xatirəsi yad edilib.
Sonra qiraət ustasının həyat və yaradıcılığına həsr olunmuş videoçarx nümayiş etdirilib.
Daha sonra aparıcı tərəfindən ədəbi-bədii gecə açıq elan edilərək, Əməkdar artist Ağalar Bayramov səhnəyə dəvət edilib.
Qiraət ustası çıxış edərək tədbirin təşkilinə görə Mərkəzi Aran Regional Mədəniyyət İdarəsinə öz təşəkkürünü bildirib.
Mərkəzi Aran Regional Mədəniyyət İdarəsinin rəisi Aydın Bəşirov çıxış edərək, Əməkdar artistin yaradıcılığı haqqında fikirlərini bölüşüb, ona ən xoş arzularını çatdırıb.
Çıxış edənlər Ağalar Bayramovu 70 illik yubileyi münasibətilə təbrik edərək, mədəniyyət və incəsənət sahəsində xidmətlərindən bəhs ediblər.
Tədbir boyunca bədii qiraət ustası tanınmış şairlərin şeirlərini səsləndirib. Mədəniyyət müəssisələrinin əməkdaşlarının ifalarında musiqilər ifa olunub.
Mərkəzi Aran Regional Mədəniyyət İdarəsi və Ucar Rayon İcra Hakimiyyəti tərəfindən Əməkdar artistə 70 illik yubileyi münasibətilə mədəniyyət sahəsində xidmətlərinə görə Fəxri fərman təqdim olunub. Həmçinin Ağdaş rayon Mədəniyyət Mərkəzinin rəssamı Məlahət İsmayıl tərəfindən çəkilən rəsm əsəri Ağalar Bayramova hədiyyə edilib.
