30 yanvar 2024-cü il tarixdə şəhər E.Vəliyev adına 2 saylı tam orta məktəbində Dağlıq Şirvan Regional Gənclər və İdman idarəsinin Qobustan rayonu üzrə gənclər və idman sektorunun təşkilatçılığı ilə "Erkən nikaha yox deyək!” mövzusunda maarifləndirici tədbir keçirilib.
Tədbirdə çıxış edən sektorun baş məsləhətçisi Elman Salmanov, şəhər 2 saylı tam orta məktəbinin direktoru Vüsalə Mamedova, tarix müəllimi İlqar Alcanov müasir dövrümüzün ən aktual problemlərindən biri olan “erkən nikahın” qızlarda yaratdığı fiziki və psixoloji fəsadlarla yanaşı, təhsildən yayınma və digər hüquqpozuntuları barədə söhbət açaraq, sağlam gənclik naminə keçirilən bugünkü tədbirin əhəmiyyətindən və doğurduğu fəsadlara və cəmiyyətə vurduğu ziyana görə erkən nikah məsələsinin dövrümüzün mühüm və aktual problemlərindən biri olduğunu diqqətlərə çatdırıblar.
Erkən nikahın gənclərə, ailələrə, bütövlükdə cəmiyyətə vurduğu zərərlər, bu sosial problemin aradan qaldırılması yolları haqqında danışılaraq bildirilib ki, erkən nikah hallarına zəmin yaradan əsas səbəblərdən birincisi təhsildən yayınmaqdır. Belə halların qarşısının alınması üçün ardıcıl maarifləndirmə tədbirlərinin aparılması zəruridir.
Erkən nikahın qarşısının alınması hər zaman dövlətimizin qarşısında duran prioritet məsələlərdən olub. Bu istiqamətdə bir çox qanun və normativ hüquqi aktlar da qəbul olunub.
Bir daha diqqətə çatdırılıb ki, valideynlərin övladlarını erkən yaşda ailə qurmağa məcbur etmələri, həm müxtəlif növ zorakılıqlara səbəb olur, həm də hüquqi baxımdan məsuliyyət yaradır.
