18 yanvar 2024-cü il tarixdə İsmayıllı rayon Heydər Əliyev Mərkəzində Dağlıq Şirvan Regional Gənclər və İdman İdarəsinin, Dağlıq Şirvan Regional Təhsil İdarəsi İsmayıllı rayon Təhsil sektoru və Heydər Əliyev Mərkəzinin birgə təşkilatçılığı ilə “20 Yanvar-Ümumxalq Hüzn Günü” nə həsr olunmuş məktəbli gənclər arasında bədii qiraət müsabiqə keçirilib.
Müsabiqədə İsmayıllı Rayon İcra Hakimiyyətinin məsul əməkdaşı Bəhruz Xələfov, Dağlıq Şirvan Regional Gənclər və İdman İdarəsinin rəis müavini Fərhad Qurbanov və idarə əməkdaşları, İsmayıllı rayon Heydər Əliyev Mərkəzinin direktoru Mayıl Fərəcov, DŞ RT sektorunun metodisti Ülviyyə Zeynalova, “İsmayıllı xəbərləri” qəzetinin redaktoru Şahməmməd Dağlaroğlu, müəllimlər və məktəblilər iştirak ediblər.
Tədbirin keçirilməsində məqsəd günün mahiyyətinin məktəblilər tərəfindən daha dərindən qavranması, onlarda belə hadisələrə düzgün rəy vermək bacarığını formalaşdırmaq, vətənpərvərlik hissini yüksəltmək, həmçinin Azərbaycan tarixinin təbliği, istedadlı şagirdlərin öz bacarıqlarını nümayiş etdirmələri üçün şəraitin yaradılmasından ibarətdir.
Bütün tədbir iştirakçıları ilə birgə vətənpərvər gənclərin qələmindən çıxmış rəsm əsərlərinə baxış keçirildikdən sonra tədbir açıq elan edilib.
Ümummilli Lider Heydər Əliyevin, “20 Yanvar şəhidləri”nin, eləcə də Azərbaycanın ərazi bütövlüyüynün təmin edilməsi uğrunda öz canlarından keçən şəhidlərin əziz xatirəsi bir dəqiqəlik sükutla yad edilib və müsabiqəyə start verilib.
Çıxışçılar qeyd edərək bildiriblər ki, unudulmamalıdır ki, 20 Yanvar istiqlal yolumuzda ilk şəhidlik zirvəsi idi. Azadlığın misilsiz nemət olduğunun dərk edildiyi o gün Azərbaycanın tarixinə, Azərbaycanın salnaməsinə qanla yazılmış tarixdir. Xalqımız o gün həyatını qurban vermiş övladlarını yad etməklə bərabər, eyni zamanda onların şəhidlik zirvəsinə baxaraq başını dik tutmalıdır. Çünki Vətən və torpaq şəhidləri ilə ucalır. Çıxışların yekununda həvəskar qiraətçilərə uğurlar arzulanıb və səsləndirdikləri şeirlər münsiflər heyəti tərəfindən böyük maraqla dinlənilib.
Vətənpərvərlik mövzülarında şeirlər səsləndirən məktəblilər münsiflər heyəti tərəfindən qiymətləndirilmiş, ən yüksək bal toplayanlar qalib gələrək DŞR Təhsil İdarəsinin və DŞR Gənclər və İdman İdarəsinin diplomları, fəxri fərmanları ilə mükafatlandırılıblar.
