Beyləqan sakini, Qarabağ müharibəsi veteranı Atakişiyev Əlikişi Böyükişi oğlu dövlət tərəfindən ona ayrılmış ünvanlı sosial yardım müavinətinin kəsilməsindən şikayətçidir
Belə ki, 2016- cı ilin dekabr ayından Ə. Atakişiyevə xəbərdarlıq etmədən onun ünvanlı sosial yardım müavinətini heç bir əsas göstərmədən kəsiblər.
Bu barədə Ulus.Az-ın əldə etdiyi məlumatda deyilir. Ə.Atakişiyevin ailəsində üç məktəbli övladı və xəstə anası var.
Ancaq heç bir səbəb və əsas göstərmədən Qarabağ veteranına verilən sosial yardım kəsilib. Ağır vəziyyətdə yaşayan və dolanışıq yeri olmayan Atakişiyev bu ölkənin azadlığı və torpaqlarımızın bütövlüyü uğrunda döyüşüb. Lakin Beyləqanda məmurlar ona təşəkkür olaraq sosial yardımını kəsirlər.
Beyləqanda ünvanlı sosial yardımların verilməsində dözülməz durum yaranıb.
Yardımların təyinatı sırf subyektiv əsaslarla aparılır, nəticədə isə doğurdan da həmin yardıma ehtiyacı olanlar kənarda qalır, yardım isə imkanlı şəxslərə verilir.
Narazılıq isə əsasən Beyləqan rayon Əhalinin Sosial Müdafiəsi Mərkəzinin şöbə müdirindəndir.
Bildirilir ki, yoxsul ailələrin vaxtında ünvanlı sosial yardım almasına kağız süründürməçiliyi, bürokratik əngəllər, məmurların rüşvətxorluğu mane olur.
Bu gün Beyləqan ƏSMM direktoru Malik Mahmudovun işçiləri sosial yardım haqqı istəyirlər.
Malik Mahmudovun “maklerləri” avtomobili, torpağı, özəl işi, yaxşı gəliri olan şəxslərin sənədlərini istədikləri kimi saxtalaşdıraraq onlara ünvanlı sosial yardım verilməsini təmin ediblər.
Halbuki Qarabağ qazisi kimi yüzlərlə ünvanlı sosial yardıma ehtiyacı olan şəxslər var və onlar dövlətimizin bu yardımından məhz Malik Mahmudovların sayəsində məhrum olublar.
Yerli sakinlər nazir Səlim Müslümovdan kömək gözləyir və ƏSMM-də yoxlamalar aparılmasını xahiş edir. Onların sözlərinə görə, komissiya Mərkəzdə nöqsanları aşkarlaya bilər.
Qarşı tərəfi dinləməyə hazırıq.
